Li dal teatri di Pordenon, il jazz si sune al viert

Il teatri “Verdi” di Pordenon al propon ancje chest an al viert, in Piazzetta Pescheria, il cartelon di “Open Jazz” firmât dal jazzist Francesco Bearzatti, cuntune sielte origjinâl e esclusive di concierts. Si tache miercus ai 28 cuntun conciert che al met adun intun unic apontament dôs propuestis diferentis, dal jazz classic fint al mont eletronic. Inte prime part, spazi al Greg Burk Quintet, il grup di un dai pianiscj plui interessants dal jazz di vuê, e po dopo il tercet eletronic Siner, formât di cualchidun dai miôr talents dal jazz talian. Ai 5 di Lui e sarà la volte di Mirko Cisilino, zovine promesse furlane de trombe, ai 12 invezit la stele americane Joey Baron cul progjet “Mixmonk”. (A.I.) – 27.06.2023