Visitis cun aperitîf ae mostre dal gurizan Francesco Caucig

La fondazion di Palazzo Coronini Cronberg di Gurize e inmanee trê seradis speciâls dedicadis ae mostre “Francesco Caucig Goriziano 1755-1828. L’uomo, l’artista, il testimone di un’epoca”, screade al 1n di Jugn. I avigniments a previodin une visite vuidade ae mostre e po dopo un aperitîf intal parc cui vins de tignude Villanova acompagnâts des creazions de coghe Clara Canzoneri. I trê apontaments, tal segn des ecelencis gurizanis inte art e intal gust, a scomencin miercus ai 28 aes 6 dopomisdì (prenotazion obligatorie, info@coronini.it). La visite vuidade ae mostre, tignude de curadore Cristina Bragaglia, e darà la oportunitât di scuvierzi la personalitât dal pitôr neoclassic Caucig, professôr ae Academie di Viene, l’artist gurizan plui famôs intal decim novesim secul. (A.I.) – 27.06.2023