Ancjemò un zovin muart tra i motocicliscj dal Friûl-Vignesie Julie. Trê intune setemane. Un om di 31 agns, George Felea, al à pierdût la vite îr di gnot pes feridis gravis dopo di une cjadude sucedude a Daçan, in vie Cesena. La vitime e jere a stâ pôc lontan dal lûc dal incident.
Par causis in cors di aciertament de bande dai Carabinîrs de compagnie di Pordenon, pôc prime des 10 e mieze sot sere, Felea al à pierdût il control de sô moto, colant a tiere.
A son stadis magari cussì no dibant lis manovris salvevite praticadis dal personâl sanitari rivât sul puest cu la ambulance e l’elisocors.
Une dinamiche simile lunis passât e veve causât la muart di un altri zovin motociclist, Federico Huisman, muart a 17 agns sul Cjars triestin dopo vê pierdût il control dal so mieç.
Cualchi ore dopo, un incident stradâl sucedût a Rude al veve causât la muart di Enrico Fedele, motociclist di 20 agns resident a Rivignan-Teor. (A.D.G.) – 03.07.2023
