Un viaç intal sun dal secul vincjesim

Grant sucès pe mostre “1000 dischi per un Secolo. 1900-2000”, un viaç intal sun dal secul vincjesim, inmaneade de associazion culturâl “Blues In Villa” ae Galarie Harry Bertoia di Pordenon e curade dal musicolic, storic e compositôr Enrico Merlin. La mostre e je stade slungjade ai 6, 7, 8, 9 e ai 13 di Lui, cun gnûfs aprofondiments musicâi in Galarie, che a van a inricjî il calendari dai avigniments. La mostre, screade il prin di Jugn pal festival “Jazzinsieme”, e je un viaç intal spazi e intal timp par celebrâ la musiche e i siei supuarts, la produzion e la tecnologjie, la art dal sun e de imagjin traviers la esposizion di 322 oparis sonoris, ponts di riferiment fondamentâi inte storie de musiche dal ‘900. (A.I.) – 04.07.2023