Udin&Jazz: prime une riflession, po dopo musiche par 9 dîs

La edizion numar 33 di “Udin&Jazz”, rassegne di musiche jazz internazionâl, e tache lunis ai 10: il prin di nûf dîs cun cetancj apontaments, e no dome concierts, intal cûr di Udin, in lûcs storics e te perifarie. La scree uficiâl cul incuintri “Jazz against the machine”, compagn dal sottitul di cheste edizion dal festival: un moment di riflession par scambiâsi ideis sul rûl de art e de musiche dal vîf intal disvilup de ere digjitâl, in program aes 6.30 dopomisdì inte Cort di Palazzo Morpurgo. Aes 9.30 sot sere, in Place Libertât a sunarà la Jazz Big Band Graz, cui ospits speciâi Arto Tunçboyacıyan e Bella Ghazaryan tal conciert titulât “Armenian spirit”. Martars ai 11, incuintris za di buinore, inte zone di vie Riccardo di Giusto, e sot sere il conciert dai Soul System Quartet. (A.I.) – 10.07.2023