A Paulâr, fieste pai 30 agns de ‘Mozartina’, la cjase-museu di Canciani

Par celebrâ il trentenâl de fondazion de cjase-museu “La Mozartina 1” di Paulâr, sede museâl dedicade ae musiche, fondade e curade dal compositôr e filantrop Giovanni Canciani (1936 – 2018), a son previodûts doi dîs di fieste. Sabide ai 15 e sabide ai 22 e vignarà screade une schirie di struments musicâi de colezion, restaurâts di pôc in graciis dal bant pal restaur de Fondazione Friuli: il fortepiano Wopaterni (1820 – 1830 plui o mancul), un piano a taule (1860), un piano Erard (1880) e un clavicembal Neupert. Pe ocasion, a vignaran sunâts cu la esecuzion di ciertis des pagjinis musicâls preferidis dal mestri Canciani. (A.I.) – 14.07.2023