Plui o mancul 150 fra inzegnîrs, architets e gjeometris a àn partecipât a un incuintri formatîf in Regjon su cemût scrivi la modulistiche par fâ otignî a impresis e privâts i jutoris pai dams patîts dopo il brut timp di chescj dîs. Intant al è stât dit che pes aziendis la Regjon e ricognossarà fint a 20 mil euros di jutori, 5 mil euros par cui che si è cjatât cu la cjase o l’auto distruts. Impuarts piçui a pet dai dams che si spere a vegnin rionts dopo il ricognossiment dal stât di emergjence nazionâl.
“Fin vuê o vin fat une ricognizion che nus permetarà di viodi trops che a son i dams. Cumò o passìn ae fase plui puntuâl. Cui modui che o metarìn a disposizion, o darìn dongje dutis lis informazions e i dâts plui precîs”. Lu à sclarît l’assessôr regjonâl cun deleghe ae Protezion civîl dal Friûl-Vignesie Julie, Riccardo Riccardi, intal cors dal incuintri che si è tignût a Udin li dal Auditorium Comelli, che dilunc di chel al à cjatât i rapresentants e i membris dai ordins dai inzegnîrs, architets, dotôrs agronoms e dotôrs forestâi, dai coleçs dai gjeometris e gjeometris laureâts des provinciis di Gurize, Udin, Triest e Pordenon, e dal ordin dai perîts industriâi dal Friûl-Vignesie Julie. L’intindiment al è stât chel di ilustrâ lis modalitâts di ristôr dai dams causâts dal brut timp che al à batût il teritori regjonâl.
“In cheste situazion o conseìn al citadin di indreçâsi al propri Comun, ancje par prossimitât. O lavorarìn ancje par assisti i Municipis cun personâl de Regjon pal distrighi des pratichis” al à zontât dopo Riccardi. “La prime valutazion dal dam e je daûr a completâsi cu lis informazions che i Comuns a àn za racuelt. O rivarìn cumò ae distribuzion dai modui che a serviran a privâts e impresis par presentâ la domande di contribût. I professioniscj a son il supuart fondamentâl pes stimis certificadis dai dams cui coscj necessaris pes restaurazions. O varìn une trentine di dîs par podêlu fâ e duncje par tirâ sù lis informazions che a rivuardaran ativitâts produtivis, i privâts e il patrimoni public – al à sclarît ancjemò l’assessôr -. Dopo dut chest, si varà a ce fâ cui struments e lis risorsis che il Stât al podarà meti a disposizion, che si zontaran a chês che za la Regjon e à metût intal propri assestament di belanç”.
La Regjon e à za stanziât plui di 52 milions di euros plui 5 milions di part corinte. “Cui che al à patît un dam, par esempli un cuviert danezât, e al vûl domandâ un ristôr cun fonts publics, al à di fâlu midiant il jutori di cui che al à la titularitât e la competence” al à sclarît ancjemò l’esponent de Zonte. Riccardi al à visât cun di plui che la Regjon Friûl-Vignesie Julie e à za puartât indevant la domande formâl di emergjence nazionâl. (a.d.g.) – 10.08.2023
