Dal prin di Setembar il Friûl-Vignesie Julie al sarà colegât di gnûf cu la Lombardie traviers svoi direts tra l’aeropuart di Roncjis di Monfalcon e Linate. I svoi di ITA Airways a saran doi par dì in lade (aes 7.30 di buinore e ae une dopomisdì) e tornade (in partence di Linate aes 11.15 di buinore e aes 8.05 sot sere) e un dilunc de fin de setemane, in partence di Triest Airport la sabide aes 8 di buinore e di Milan Linate la domenie aes 8.05 sot sere.
Une altre riduzion dal cost dal biliet e vignarà ufierte a dôs tipologjiis di residents: i students sot dai 27 agns e a cui che al à plui di 65 agns e che si movin par motîfs di salût, che a podaran viazâ de stazion regjonâl sui svoi ITA di e par Milan Linate, simpri al cost massim di 49 euros par trate, cence tignî cont de date di acuist.
Sui presits, ducj i residents in Friûl-Vignesie Julie a beneficiaran di une cuote massime dal cost dai biliets di 55 euros par trate se ju cuistaran prime di 10 dîs de date dal svol; passât chest tiermin, la tarife no podarà in dut câs passâ i 125 euros a trate al net des tassis.
“Il colegament aeri diret tra Roncjis e il centri di Milan – di podê rivâ di Linate in 12 minûts in graciis de gnove linie de metropolitane – al è un servizi strategjic che al conet la nestre regjon a un dai cûrs vîfs e strategjics de economie taliane, a vantaç des impresis e dai citadins dal Friûl-Vignesie Julie”, al à comentât il governadôr Massimiliano Fedriga. (a.d.g.) – 11.08.2023
