Passe 2,5 toneladis di cocaine a son stadis distrutis de Vuardie di Finance intal brusadôr di Triest: part des 4,3 toneladis secuestradis tra il 2021 e il 2022 dilunc de “Operazione Geppo 2021”. La operazion e veve puartât ae emission di une ordenance di custodie cautelâr in preson par 38 personis, in Italie, in Colombie e in diviers Paîs europeans, di là dal secuestri di plui o mancul doi milions di euros in contants.
La distruzion de droghe e rapresente la fase finâl de azion investigative, coordenade de Direzion Distretuâl Antimafie, li che i oms de Vuardie di Finance di Triest a àn puartât a tiermin une operazion ecezionâl, no dome pe cuantitât dal stupefacent secuestrât, ma soredut pal numar di consegnis controladis. Disenûf operazions “sot cuviertidure” fatis fra il Mai 2021 e il Mai 2022, là che i financîrs a jerin rivâts a lâ dentri intai ganglis des organizazions criminâls coinvoltis.
La ativitât, coordenade dal Pm Federico Frezza, e veve permetût, di là dal secuestri de cocaine che sul marcjât e varès vût un valôr tra i 240 e i 500 milions di euros, l’arest di esponents di rilêf de criminalitât organizade calabrese e dal innomenât clan dal Golf in Colombie. (a.d.g.) – 23.08.2023
