Cundut che al ledi indevant il câl produtîf a pet dal an passât, lis fabrichis in provincie di Udin a mostrin segns di resistence e adatament al andament dal cicli economic mondiâl, che al è daûr a indebilîsi, e dal marcjât interni, soredut par ce che al tocje la evoluzion dal PNRR, che il Guvier al à proponût di pôc ciertis modificazions.
Al è ce che al ven fûr de analisi dai dâts de investigazion trimestrâl elaborâts dal Ufici studis di Confindustria Udin. Intal detai, intal secont trimestri 2023 la produzion industriâl in provincie di Udin e je calade dal 4,4% a pet dal stes periodi dal 2022 (intal prin trimestri si jere regjistrât un câl tendenziâl inferiôr, dal -1,2%), ma e je cressude dal 0,4% a pet dai trê mês precedents.
A preocupin i ordenatîfs, che a regjistrin su base tendenziâl un câl dal 1,8% e dal 6,8% a pet dal prin trimestri dal an. In sbassament lizêr ancje l’ûs dai implants produtîfs, cuntun tas lât jù al 77,8% dal 78,7% dai ultins doi trimestris. Il ralentament, al moment, nol prodûs efiets su la ocupazion, che e reste stabile.
A van piês lis previsions pal tierç trimestri 2023 sul andament de produzion industriâl, stant che dome che il 4% dai intervistâts al previôt une incressite de stesse, il 62% al previôt l’assestament e il 34% al pronostiche une sô contrazion. (a.d.g.) – 29.08.23
