E je passade in maniere trancuile la gnot inte palacine di Vie Battaglione Gemona a Cordovât, dulà che di îr di matine, miercus ai 30 di Avost, un om di 55 agns, ex militâr in pension, origjinari di S. Donà di Piave, si è baricât in cjase, armât di tantis sclopis sportivis, cence dâ nissune rispueste ai Carabinîrs che a cirin di inviâ un dialic par convincilu a molâ dal so fâ.
Îr di sere sul tart e vie pe gnot l’om, che – stant a ce che al jere riferît di investigadôrs e autoritât – al patìs di problemis psichics, al à publicât trê videos su YouTube dulà che al acuse un maressial dai carabinîrs e un altri negoziadôr di istigazion al suicidi “par motîfs dibant” e là che al sclarìs che nol à vût e nol à intindiment di doprâ lis armis.
I videos a son monolics luncs, in cualchi passaç a çavariin: il prin al dure plui o mancul 6 minûts e al è stât publicât tor des 7 e 45 sot sere; par desenis e desenis di voltis, l’om al dîs di jessi vitime di induzion al suicidi.
Il secont al dure plui di 7 minûts. Al è stât publicât pôc dopo lis 10 sot sere. In chel l’ex militâr al dîs di no vê palesât intindiments violents.
Il tierç al è stât publicât intal cûr de gnot e al conten lis afermazions su la volontât di no doprâ lis armis. Intai videos l’om al aparìs cualchi volte cu la muse iluminade, ancje dome in maniere parziâl, altris voltis il video al è neri e l’om al fevele tal scûr.
Ae abitazion, par decision des Fuarcis dal ordin, e je stade stacade sedi la corinte eletriche, sedi il gas.
Dute la zone di vie Battaglione Gemona, strade centrâl di Cordovât, e je contornade di Polizie e Carabinîrs di îr di matine cence interuzion. L’edifici dulà che si cjate l’om, cognossût par fâ une vite tant dislontanade e pôc cognossût in paîs, al è stât sfolât e lis fameis che a vivevin a àn passât la gnot ospitâts di parincj o amîs .
La vicende e je scomençade îr di matine cuant che l’om al è lât fûr par strade e al à scomençât a berlâ, par dopo jentrâ inte proprie abitazion e sierasi dentri. I Carabinîrs di Pordenon, îr di sere, intune note a àn contradit che, prime di sierâsi in cjase, l’om al vedi menaçât des personis par strade.
Il Cuestôr di Pordenon, Luca Carocci, al à dit che l’om “al à tantis sclopis par ûs sportîf”. Propit ae detenzion des sclopis e je di fâ rimontâ dute la vicende dal moment che lis fuarcis di polizie a vevin fat une serie di aciertaments sul ecuilibri psicofisic dal om prime dal rinovament dal permès di detignî lis armis. Al so dinei di consegnâlis in maniere spontanie, la Cuesture e à informât il Prefet di Pordenon che al à adotât il proviodiment di secuestri des sclopis, mandat ai Carabinîrs pe esecuzion.
L’om al à reagjît publicant menacis a cualchi autoritât de provincie di Pordenon, baricânsi in cjase e cence rispuindi aes provis di dialic dai mediatôrs dai Carabinîrs. (a.d.g.) -31.08.23
