La Fondazion Agrifood Fvg e à elaborât i dâts che a fotografin la dimension de filiere dal arlevament dai purcits inte nestre regjon. I arlevaments a son 1.765, cjapant dentri chei dedicâts ae riproduzion, al ingràs e chei familiârs. Ai 30 di Jugn dal 2023 il numar di purcits regjistrâts al è in dut di 244.344.
A pet dal totâl nazionâl, il Friûl-Vignesie Julie al rapresente l’1,68% dai arlevaments e il 2,93% in tiermins di bestiis.
Il numar di macelazions intal 2022 al è stât di 61.683, intant che intai prins siet mês di chest an a son stadis 34.005. La nestre regjon, rivuart l’anel dai macei, si met inte part basse de classifiche nazionâl, ben lontane di regjons tant che Emilie-Romagne e Lombardie, indulà che il numar di bestiis copadis al passe i 3,6 milions par an. Une vore dispès i suins arlevâts in Friûl-Vignesie Julie a vegnin trasferîts intai macei di altris regjons. (a.d.g.) – 01.09.23
