“Si riconferme ancjemò une volte il rûl des ativitâts dal compart servizis cumierç-turisim e servizis aes aziendis e aes personis ancje sui dâts des gnovis assunzions”. Al comente cussì il president de Cjamare di Cumierç Pordenone-Udine Giovanni Da Pozzo i dâts plui resints dal Boletin dal Sisteme informatîf Excelsior, fat di Unioncamere in colaborazion cun Anpal e elaborât pal F-Vj dal Centri Studis de Cjamare di Cumierç Pordenone-Udine.
Jentrant intal detai dal report, a risultin 10.770 i lavoradôrs ricercjâts des impresis (cuntun contrat a timp determinât superiôr a un mês o a timp indeterminât) pal mês di Setembar, dât in sostance stabil a pet di cetant programât un an indaûr. Par dut il trimestri Setembar-Novembar 2023 lis assunzions previodudis a son plui di 29 mil, in cressite dal 0,5% a pet dal periodi analic dal 2022.
E continue a cressi la dificoltât di reperiment segnalade des impresis che e cjape il 56,6% des assunzions programadis, in aument di 4 ponts percentuâi a pet di dodis mês indaûr. A son lis grandis impresis (cun plui di 250 dipendents) a incressi a pet dal 2022 lis assunzions programadis (+160 assunzions intal mês), intant che lis impresis plui piçulis a previodin par Setembar un câl des assunzions. (a.d.g.) – 04.09.23
