Si intitule “Api grige” e al jessarà in ocasion di “pordenonelegge 2023″ il gnûf romanç di Andrei Kurkov, la vôs leterarie plui cognossude de Ucraine al dì di vuê. Al sarà propit lui a screâ il festival dal libri e dai autôrs, miercus ai 13 aes 6 dopomisdì, li dal Teatri Verdi di Pordenon. E in anteprime assolude al rivarà ancje il scritôr Éric-Emmanuel Schmitt: a son dome che un pâr des 65 anteprimis che pordenonelegge al ospite chest an, dai 13 ai 17 di Setembar. Un autôr su 5 al puartarà la sô novitât, e chest al è di simpri il valôr zontât dal festival, dulà che a saran ancje gjornaliscj di riferiment, il câs leterari dal an Erin Doom, passe 60 vôs de poesie taliane e foreste. E un voli speciâl pai zovins: 200 di lôr a saran invidâts ae inaugurazion tant che “ospits di onôr”. Par chei altris, i percors dedicâts a TikTok, un podcast e tancj incuintris su lis gnovis tecnologjiis. (A.I.) – 11.09.2023
134
