Al è stât firmât vuê, a Manzan, il Contrat di flum, che i aderissin la Regjon Friûl-Vignesie Julie, la Associazion Parco del Natisone, i Comuns di Manzan, Taipane, Pulfar, S. Pieri dai Sclavons, Cividât, Premariâs, S. Zuan dal Nadison, Cjopris Viscon e Trivignan Udinês, la Autoritât di bacin e l’Acuedot Poiana.
“La sotscrizion dal Contrat di flum dal Nadison – al à dit l’assessôr regjonâl al Ambient Fabio Scoccimarro – e je une piere miliâr, un passaç di impuartance straordenarie che e rive ae fin di un lunc percors partecipatîf là che il sens ultin al è il fat che i citadins a cjapin part ative ae gjestion dai teritoris fluviâi”.
“Cul Contrat di flum – al à osservât Scoccimarro, secont ce che e riferìs la Zonte Regjonâl – o podìn coniugâ lis esigjencis dal teritori su la sigurece idrauliche (pericul di diluvions), ae cualitât dai ecosistemis acuatics, al miorament dal paisaç, ae fruizion dal teritori, aes esigjencis economichis dal teritori, inte otiche di un disvilup sostignibil. E je la tape fondamentâl di une strade mestre, incancarade intai procès di planificazion, ma vierte al contribût di ducj, che la Regjon e à cirût di razunzi cun convinzion e che vuê al rapresente un passaç di ricuardâ. O dîs ‘tape’ parcè che la firme di vuê no segne une sierade, ma il principi di un gnûf impegn coletîf di puartâ indenant a tutele de ricjece des risorsis idrichis e de capilaritât dai deflùs”. (a.d.g.) – 11.09.23
