Il festival ‘Dialoghi’ par cuatri dîs a Insic

Di joibe ai 14 a domenie ai 17 di Setembar, tal Borc medievâl di Insic e là dongje, si tignarà la rassegne “Le muse a Giassico”, dentri de programazion dal Festival internazionâl e itinerant de cognossince “Dialoghi”, inmaneât de associazion Culturaglobale par vierzi un cantin sul mont de informazion, de creativitât leterarie e artistiche. I cuatri dîs, pensâts par valorizâ il borc in comun di Cormons cun incuintris culturâi, musiche, teatri, a tachin li de Cjase Riz cui scritôrs e editôrs Luca Buiat, Nicoletta Storari e Hans Kitzmüller. Vinars ai 15 inte Glesie di S. Quarin al larà in sene “Guance bianche e rosse”, sabide ai 16 musiche e no dome, intant che domenie ai 17 e sarà dute dedicade ai “benandants”, dal prin spetacul aes 11 dongje dal Judri e dal Cuar, fin al conciert di un grup talian sloven di folk etnic. (A.I.) – 12.09.2023