Un an di preson ae massarie

E robave lis zoiis de femine li che e lavorave e dopo lis vendeve li dal Compro oro, fin cuant che la parone di cjase si è acuarte che la cassele li che a jerin metudis e jere vueide, e le à denunziade. Une massarie di 58 agns di Codroip e je stade condanade dal tribunâl di Udin a un an di reclusion, pene sospindude, di là dal risarciment di 8 mil euros. La serie di robariis e jere stade fate dilunc dal 2020. La colaboradore si è difindude in aule sostignint di jessi stade incjariade de parone di cjase di vendi lis zoiis, ma la sô version no je stade crodude. Il so difensôr, l’avocat Luca Zanfagnini, al à anunziât ricors. (a.d.g.) – 13.09.23