Un zîr in bici par lis vilis storichis di Lignan

Al è in program sabide ai 16 a Lignan il zîr vuidât aes vilis storichis, un apontament dedicât ai apassionâts e ai curiôs di architeture e storie de localitât balneâr furlane. Des 10 aes 12 di matine si podarà di fat partecipâ al zîr in biciclete par viodi lis architeturis tipichis dal Nûfcent di Pinede e Riviere. La iniziative e puartarà i partecipants ae scuvierte des vilis progjetadis di Giovanni Avon, Aldo Bernardis, Marcello D’Olivo e altris architets innomenâts, che a àn caraterizât e impreziosît la plante urbanistiche di Lignan. Si va de maraveose Vile Mainardis, protagoniste di un set cinematografic, ae Vile di Alberto Sordi, frecuentade dal atôr roman cu lis sôs sûrs intai agns’ 60, fint al Tren, il centri comerciâl di Pinede firmât dal gjeni di Marcello D’Olivo. (A.I.) – 15.09.2023