Al è di 40 personis segnaladis ae Autoritât judiziarie e di 36 violazions aministrativis, par complessîfs 60 mil euros di sanzions, il belanç des operazions fatis intal ultin an dal Nucli operatîf pe ativitât di vigjilance ambientâl (Noava), orghin dal Cuarp forestâl regjonâl cjapât dentri dal Setembar dal 2022 inte Direzion centrâl difese dal ambient, energjie e disvilup sostignibil.
I controi fats dal Noava a son stâts dreçâts prin di dut ai implants di recupar, smaltiment e traspuart dai refudums, cun rivuart particolâr a chei che a vegnin de ativitât edilizie. Lis verifichis a àn fat saltâ fûr che, cundut de normative che e tocje lis modalitâts di traspuart dai refudums e sedi in vore di plui di 25 agns, a risultin ancjemò masse lis violazions che ogni dì a son rilevadis, soredut pe mancjade iscrizion (obligatorie) ae Liste nazionâl gjestôrs ambientâi e al mancjât conferiment dai refudums intai implants autorizâts pal lôr recupar o smaltiment.
Intal cors des ispezions lis violazions plui comunis a àn rivuardât il mancjât adempiment des prescrizions contignudis intes autorizazions, la falade tignude dai documents necessaris par garantî la segnabilitât dai refudums e la eventuâl corete trasformazion in materiâi di podê tornâ a doprâ, il mancjât rispiet des normis su lis emissions in atmosfere, la gjestion iregolâr dai scarics di arlevament.
Di là dai controi sul traspuart dai refudums, Noava, colaborant in mût trasversâl cui diviers servizis de Direzion ambient e cun variis Poliziis locâls dal teritori e altris organisims di vigjilance teritoriâls, al à ispezionât tancj implants autorizâts pe ativitât di compostazion e recupar di scarts plastics e ferôs. (a.d.g.) – 19.09.23
