Lis impresis disponibilis sul marcjât no bastin par gjestî il numar di intervents necessaris e ancje il personâl des Vuardiis dal fûc al domandarès rinfuarçs. Al è ce che al è saltât fûr vuê a buinore in Prefeture a Udin, dilunc dal incuintri tra Prefet, sindics dai Comuns coinvolts e il Comant provinciâl des Vuardiis dal fûc su lis problematichis leadis ae emergjence dal brut timp dal Lui passât.
Lu à sclarît l’assessôr cun deleghe ae Protezion civîl dal Friûl-Vignesie Julie, Riccardo Riccardi, ae fin dal vertiç che si è tignût ancje cui referents di Ance Udin e Confartigianato Fvg “Un confront clâr, necessari e avantazôs chel che si è tignût vuê a buinore intal palaç dal Guvier di Udin cul Prefet, lis Vuardiis dal fûc, lis referentis, lis impresis e i sindics dai Comuns colpîts dal brut timp di Lui e di Avost 2023; un confront plui che mai impuartant par capî cemût frontâ e gjestî lis clamadis dai citadins che a domandin un socors tecnic urgjent sui cuvierts des cjasis dulà che a vivin, che a presentin problematichis di dam, pe tignude, dopo la prime cuviertidure cun teis e peçs”. “Passade la fase prime di emergjence, distinte di un coordenament ecelent tra lis fuarcis in cjamp – al à sclarît Riccardi -, cumò o continuìn a lavorâ cu la racuelte in linie, des domandis di ristôr dai dams de bande dai privâts, che e scomence vuê. Un lavôr fondamentâl par dâ une rispueste plui svelte che si pues al citadin danezât de calamitât”. (a.d.g.) – 19.09.23
