“Friuli Storia”: la consegne dal premi e devente une fieste

E sarà une grande fieste di aprofondiment storic la cerimonie di premiazion de decime edizion di “Friuli Storia”, in program joibe ai 28, aes 6 dopomisdì, intal Salon dal Parlament in Cjistiel a Udin. Protagoniscj a saran prin di dut i doi vincidôrs ex aequo, i storics Thomas Hippler, autôr di “Il governo del cielo”, e Vittorio Coco, autôr di “Il generale Della Chiesa”. Ma protagoniste e sarà ancje la comunitât straordenarie dai letôrs di “Friuli Storia”: cinccent dome par cheste ultime edizion e plui di doi mil intai agns i apassionâts sielts pe jurie popolâr. Intune citât deventade une des “capitâls” europeanis de storie contemporanie, la consegne dal Premi si trasformarà intune cunvigne cui vincidôrs, vuidade dal gjornalist Massimo Bernardini, ancje cun Tommaso Piffer, che al à fondât “Friuli Storia”, e il neopresident de associazion, Ernesto Galli della Loggia. (A.I.) – 26.09.2023