Un lari al è finît in manetis, il so compliç, invezit, al è rivât a scjampâ. Doi delincuents a son stâts cjatâts intant che a jerin impegnâts a furigâ tra lis mobiliis e i armarons di une abitazion di Udin.
La azion e je stade tentade vie pe gnot di miercus ai 27 di Setembar intune abitazion di vie Carneo. A disfantâle la segnalazion di un vicin di cjase, che al veve viodût un no cognossût jentrâ intun zardin centât, e l’intervent dai oms de Polizie di Stât. Dopo l’alarme sul puest e je rivade une Volante. Daurman doi agjents a son jentrâts in cjase traviers un barcon dal plan tiere restât viert.
Propri chi i poliziots a àn becât un om intant che al scrusignave inte abitazion impugnant une torce eletriche. La fuide dal malvivent e je stade disfantade, cundut de barufe cui doi poliziots.
A finî in manetis un citadin gjeorgjian di 33 agns, cjatât in possès di doi pontepet di aur a pene robâts. Fuide lade ben, invezit, pal compliç. Inte matinade di sabide, validât l’arest, il Gip al à disponût intai siei confronts la misure de custodie cautelâr in preson par rapine improprie in abitazion. Dilunc de operazion, un agjent si è ferît procurantsi scussadis ai braçs e une distorsion fuarte ae cjavile diestre. (a.d.g.) – 03.10.23
