Inte suaze des celebrazions inmaneadis dal Comun di Triest adun cuntune grande scuadre di istituzions pai cent agns di “La coscienza di Zeno” – il romanç di Italo Svevo, voltât intune vore di lenghis, calcolât une opare mestre dal modernisim –, e rive la cunvigne internazionâl promovude de Universitât de capitâl. L’avigniment, che al tache joibe ai 12 par sierâsi sabide ai 14 di Otubar cun acès viert ancje al public di difûr, al darà adun a Triest une cincuantine di esperts di dut il mont par discuti e rifleti su la molteplicitât di ispirazions che “La coscienza di Zeno” e à dismovût e e continue a dismovi. Ai 21 di Novembar, la Zornade de leture a vôs alte e deventarà ancje la “Zornade sveviane” cuntune maratone di leture dal libri. In concomitance cul complean di Svevo, ai 19 di Dicembar, a saran ancje inmaneâts cetancj spetacui teatrâi e musicâls. (A.I.) – 10.10.2023
Foto dal Archivi dal Museu Svevian
