Al è dut pront pe otave stagjon di Maman!, la trasmission televisive in lenghe furlane, risultât di une coproduzion de ARLeF – Agjenzie regjonâl pe lenghe furlane e di Telefriuli.
Daria Miani, adun cul so cjâr gjatut Vigji, a son pronts par tornâ a intratignî i fruts dai 4 ai 8 agns di etât, che propit par lôr al è pensât il program. La trasmission e larà in onde cui 13 di Otubar che al ven fin al mês di Jugn, ducj i vinars aes 18.30 e in repliche di domenie aes 7 e aes 13.
La formule di Maman! e je, za de sô prime stagjon, un miscliç di intratigniment educatîf, spazis dedicâts al zûc, moments di diversion cui cartons animâts, leturis e musiche. La gnove serie si presente, come simpri, siore di rubrichis divertentis e stimolantis, come “La cusine Bete”, la cusine strambe e colorade di Daria Miani (alias la stesse Daria), che ur spiegarà ai fruts cemût realizâ tancj lavoruts simpatics midiant di laboratoris o dant sugjeriments par risolvi piçulis situazions de vite di ogni dì. Stant il sucès de stagjon passade, e torne la rubriche “Zuìn cu lis lenghis” che e à tant che protagoniscj i piçui Max e Leo: i doi fradis, che a fevelin in maniere fluente inglês, furlan e talian, si confrontaran cun Daria Miani zuiant e insegnant ai plui piçui tantis peraulis dal inglês cu la lôr corispondence tal furlan.
No pues mancjâ l’apontament cu “La pueste di Maman!”, là che la condutore e je impegnade tal rispuindi aes domandis mandadis dai piçui telespetatôrs; “Leìn insiemi” al è il moment dedicât ae leture di flabis e contis; “Fasìn un zûc” al cjape dentri i fruts cun zûcs e quiz.
In ogni pontade, po dopo, no mancjaran il moment dedicât ai cartons animâts – in particolâr te seconde part de stagjon al sarà presentât un gnûf, che al fasarà divertî i plui piçui cu… la matematiche – e chel dedicât ai videofumets cun protagonist il piçul riç Ghiti e i siei tancj amîs besteutis. Par balâ e cjantâ insiemi par furlan, a saran invezit proponudis gnovis videocjançons in Sacheburache (un progjet Belka Media) come ancje chês di Vosutis te sachete (un progjet de Associazion musicâl “Bertrando di Aquileia”).
Dutis lis gnovis pontadis di Maman! a saran po dopo a disposizion su la tv on demand di Telefriuli come ancje sul canâl YouTube e sul sît de ARLeF. Achì a son za presintis lis 194 pontadis des stagjons passadis e sul sît i fruts a cjataran ancje altris contignûts simpatics leâts simpri a Maman!.
Midiant dal divertiment, de narazion e dal zûc, la finalitât di Maman! e je chê di esponi i fruts al plurilinguisim e ai tancj vantaçs cognitîfs che a vegnin dal doprâ plui lenghis za di picinins insù. (a.d.g.) – 10.10.23
