A Purcie al torne il cine su Lino Zanussi

Dopo la prime di Pordenonelegge a Cinemazero, cun dôs proiezions che a àn fat il plen di public, a son previodudis altris trê replichis par “Cavalcando la tigre. Vita di Lino Zanussi”. Di vinars ai 13 a domenie ai 15 in Sale Diemoz a Purcie, proiezion dal cine documentari scrit e diret di Piergiorgio Grizzo su la vite e lis oparis dal grant cjapitani di industrie furlan. La opare, che e messede ripresis dal vêr, intervistis e materiâi di archivi, e viôt l’atôr udinês Raffaello Balzo tal puest di Zanussi e altris atôrs nostrans tant che Andrea Appi e Ramiro Besa, ven a stâi I Papu. (A.I.) – 12.10.2023