“L’incuintri cul president dai Stâts Unîts Joe Biden e la uficializazion dal Friûl-Vignesie Julie tant che Regjon di Onôr 2024 de bande de National Italian American Foundation (Niaf) nus jemplin di braùre. Al è previodût daurman un prin incuintri operatîf cun Niaf par confrontâsi su lis azions di colaborazion in viste de Regjon di Onôr 2024”.
Lu à dit il governadôr dal Friûl-Vignesie Julie, Massimiliano Fedriga, a coment dal so incuintri cul president dai Stâts Unîts in ocasion de fieste pal 48m aniversari de Niaf, cuant che al è stât uficializât ancje il ricognossiment de nestre regjon tant che “Regjon di Onôr” pal 2024. Ogni an, di fat, Niaf e colabore cuntune Regjon in Italie par promovi la sô culture e lis oportunitâts di invistiment intal nestri Paîs. La Regjon di Onôr 2023 pe Associazion dai italo-americans e je la Emilie-Romagne rapresentade al avigniment dal so president Stefano Bonaccini.
“Lis azions metudis in vore in cheste mission e in chês precedentis – al è lât indevant Fedriga – a àn permetût di rivâ a chest impuartant risultât che al rapresente une ocasion di grande rilevance par presentâ lis nestris ecelencis a une platee cussì largje e cualificade e rinfuarçâ i rapuarts comerciâi tra Stâts Unîts e Italie, in particolâr cul Friûl-Vignesie Julie”. (a.d.g.) – 16.10.23
