Tratament di refudums no permetûts, ma no pericolôs: il Nucli operatîf pe ativitât di vigjilance ambientâl (Noava) dal Cuarp forestâl regjonâl, su deleghe de Procure di Udin, al à secuestrât a Manzan un implant pal tratament dai refudums.
Cul aciertaments a àn scuviert che in chel implant si faseve une ativitât di recupar di refudums in violazion di ce che al jere prescrit de Autorizazion uniche ambientâl dade de Regjon.
Lis violazions a àn rivuardât il tratament di refudums no consintûts, di chei butâts su areis no pavimentadis e in areis scuviertis, la presince no previodude di machinaris, la contaminazion di diviersis tipologjiis di refudums e altris diviersis diformitâts a pet dal at autorizatîf dât. In chest mût si è concretizât a cjame dal titulâr dal implant un ilecit di nature penâl, che al à vût tant che consecuence il secuestri. (a.d.g.) – 17.10.23
