Al ‘Verdi’ di Pordenon si studie la mont

Dute intal segn dal impegn pe difese e la valorizazion des ‘tieris altis’ e des personis che a son a stâ alì, il “Progetto Montagna” al è stât ideât dal Teatri “Verdi” di Pordenon di intese cul Cai-Club Alpin Talian. Vie pai agns il progjet al à inmaneât impuartants avigniments estîfs – spetacui e concierts a cuote alte – e apontaments invernâi a Pordenon, dongje di un concors di dramaturgjie su la mont. Cumò al nas il gnûf percors “R-Evolution Green”, un cicli inedit di incuintris publics di aprofondiment sientific-divulgatîf sui temis leâts aes tieris altis, in program li dal “Verdi” dai 25 di Otubar ai 4 di Avrîl dal 2024, par esplorâ tematichis leadis al disvilup sostignibil e a un percors di rigjenerazion. Miercus il prin apontament sul teme “la ambivalence de Mont” par indagâ cun Annibale Salsa, innomenât antropolic e sagjist, cemût che la mont e sedi un lûc che al gjenere atrazion e repulsion. (A.I.) – 23.10.2023