Doi citadins rumens di 23 e 30 agns a son stâts fermâts pal reât di ricetazion e denunziâts par resistence a public uficiâl, ae fin di un inseguiment stradâl de bande de Polizie di Gurize, che ju veve intercetâts no lontan dal confin cu la Slovenie. I doi si cjatavin in doi veicui diviers: un furgon e une berline cun targhe francese su la autostrade A34, a pocje distance l’un di chel altri. Cuant che la patulie de Polizie stradâl e à comandât l’alt al furgon, il conducent invezit di fermâsi al à acelerât al improvîs avertint cui fârs inceants il compliç tal veicul che lu precedeve.
Dopo un pâr di chilometris, l’om al à frenât a sec e al à cirût di rivâ ae Passat che lu spietave pôcs metris plui indenant. I poliziots a son rivâts dut câs a blocâ i doi oms. Intal furgon a jerin 29 bicicletis e furniments sportîfs par un valôr complessîf di plui o mancul 40 mil euros. La plui part dal materiâl e jere il botin di une robarie fate il dì prime intune dite francese a Saint Bonnet. (a.d.g.) – 25.10.23
