Promozion de identitât furlane cu la Zornade dai Conseis Comunâi dai Fruts

A son stâts passe 200 – tra zovins students, insegnants e acompagnadôrs – i protagoniscj da la seconde edizion da la “Zornade dai Conseis Comunâi dai Fruts dal Friûl”, inmaneade de Assemblee de Comunitât Linguistiche Furlane (ACLiF, che e à 141 Comuns aderents) a Udin intal auditorium Comelli de sede de Regjon Autonome Friûl-Vignesie Julie. Pe ocasion a son stadis fatis ancje lis premiazions dal concors pai progjets di promozion de identitât furlane: a vinci il premi – un contribût economic par realizâ il progjet – i Conseis Comunâi dai Fruts di Glemone, Merêt di Tombe, S. Denêl, Dartigne, Muçane, S. Vît di Feagne e Voleson Darzin cun S. Martin dal Tiliment (Consei comunâl dai Fruts ugnul par chei doi Comuns). La jurie formade de ACLiF, cun ancje i siei vecjos presidents e adun cun ARLeF e Societât Filologjiche Furlane, e à lavorât fis par valutâ i progjets. In dut a àn partecipât al concors 14 Conseis Comunâi dai Fruts. Parsore dai 7 nomenâts che a àn vût il contribût, segnalazions ancje par Cjarlins, Paulâr, Porpêt, Rude, Talmassons, Tavagnà e Tresesin. (A.I.) – 30.10.2023