La nestre regjon e je di gnûf batude dal brut timp e dopo i episodis dai dîs passâts la atenzion e reste alte intes areis colpidis dai slacs. A restin sot dal monitorament de Protezion civîl in particolâr Tarcint e Lusevare. La alerte narancine e rivuarde dute la zornade di vuê e chê di doman: e interesse dut il teritori regjonâl, gjavant Triest.
Ancjemò burascjadis e aghe alte, cun ploiis a nivel locâl ancje fuartis, di là di temporâi e aiar fuart.
La situazion e je destinade a lâ in piês dopomisdì e di sere cuant che il Siroc dilunc de marine al varès di intensificâsi e, cul passâ des oris, di gnot passâ di sostignût a fuart. Duncje si spietin ploie e temporâi dilunc de fasse prealpine e dute la zone di mont cun ploie tant intense e aiar fuart di Sud a cuote alte, e burascjadis tra Lignan e Grau che a continuaran ancje te matine di doman. Dome tal dopomisdì di doman al varès di scomençâ un miorament, cun aiar mancul fuart. (a.d.g.) – 30.10.23
