Ultin dì pal festival di cine di fantasience

Ultin dì di proiezions e grancj apontaments miercus al 1n di Novembar al “Trieste Science+Fiction Festival”, la manifestazion tra sience e fantasience che si sierarà cu la cerimonie tradizionâl di premiazion serâl li dal Politeama Rossetti. La zornade si vierç aes 11 di matine cu la proiezion de version restaurade in 4K di “L’uomo dagli occhi a raggi X” di Roger Corman, une piere miliâr de fantasience dai agns ’60. Des 2.30 dopomisdì, la ultime selezion di curts par “Fantastic Shorts” e po dopo la anteprime internazionâl di “M” di Vardan Tozija. Des 8 sot sere li dal “Rossetti”, la tradizionâl cerimonie di premiazion dal Festival, cun ducj i premis de manifestazion. A sierâ, la anteprime dal cine “The Beast” di Bertrand Bonello. (A.I.) – 31.10.2023