Friûl Europe-Cjasis plui ‘verdis’ tal rispiet dai citadins

La riforme clamade Renovation Wave e vûl obleâ i citadins europeans a justâ lis cjasis daurman e à puartâlis intune classe energjetiche alte. “E je une propueste di diretive sburtade di un ambientalisim ideologjic di une bande de Europe che no ten cont di une lungje storie daûr dai Paîs, come la Italie, e che e à chê di imponi un cambiament masse svelt cence nancje cognossi la situazion di chenti” e je la posizion, fintremai di cuant che si è scomençât a discori, de parlamentarie europeane Elena Lizzi.
Il lavôr fat di jê, insiemi cun dut de Lega Salvini Premier-Gruppo Identità e Democrazia al Parlamento europeo, al sta puartant risultâts. Propit cualchi zornade indaûr, il ‘trilogo’ (ven a stâi la riunion dai rapresentants dal Parlament, dal Consei e de Comission) nol à cjatât un acuardi e cussì al à puartât a Dicembar la soluzion, che di sigûr e sarà plui morbide di cemût che e jere stade metude in principi.
“Rispiet a cetantis regjons dal Centri e dal Nord Europe – e sclarìs ancjemò la furlane Lizzi –, dulà che lis cjasis a son stadis fatis poc timp indaûr, il disvilup in Italie al è stât soredut tai Agns ’50 e ’80 dal Nûfcent, cuant che ancjemò no esistevin sedi lis leçs sedi la tecnologjie par il sparagn di energjie. Cumò no si pues obleâ dut un Paîs a savoltâ dutis lis sôs cjasis dome par un ambientalisim ideologjic”.
I numars a son clârs ancje tal nestri Friûl. Cjalant il dossier dât fûr de Enea pal 2021, inte nestre regjon il 29% des cjasis a son in classe energjetiche G, la plui basse. In plui, il 21% a son in classe F, il 16% in E e cuasi il 13% in classe D.Lis cjasis plui sparagninis pal discors de energjie e son pardabon ancjemò pocjis: mancul dal 11 par cent in dutis lis classis A.
“Di sigûr i obietîfs dal Green Deal a son juscj e rindi ancje lis cjasis plui ‘verdis’ al è un ben – e continue Lizzi –, ma no si pues pretindi di fâlu dut intun colp. Al covente timp e bisugne stâ une vore in vuaite che no deventedi dut un dan pai citadins. Ven a stâi che no ducj a àn bêçs par fâ i lavôrs e, se no ju fasin, al è il risi che il valôr de cjase al ledi une vore jù. In plui, une fuarte domande al setôr de edilizie al puartarès a scjaldâ une vore i presits, come che o vin viodût cun dut il discors dal Superbonus 110 par cent”.
Chel che al propon il grup de Lega Salvini Premier in Europe al è un ambientalisim no ideologjic, ma dal bas, judant, cence cori, lis fameis a inzornâ lis cjasis. “No o restìn cuintri chest progjet di diretive – e siere Lizzi – che al rint dome plui puars i nestris citadins. O sin, invezit, a pro di un percors volontari e cun timps plui luncs”.
(Informazion par cure dal grup “Identità e democrazia – Lega Salvini Premier”) – 06.11.2023