“Il svol in elicotar al à confermât i dams ai litorâi e aes cuestis de nestre regjon, in particolâr a Grau, là che la rasule e risulte mangjade a fuart. Ancje i dams in mont a son impuartants. La Protezion civîl e je ative za di diviers dîs par meti in sigurece viabilitât e teritori, a tutele des comunitâts”. Lu à riferît l’assessôr regjonâl ae Protezion civîl, Riccardo Riccardi, al tiermin di un zîr in elicotar jevât de sede di Palme. La prime aree visionade e je stade chê di Lignan, dulà che il lît al à segns impuartants di erosion e a saran di fâ cetancj lavôrs. Dal alt, i dams a risultin plui impuartants ancjemò pe rasule di Grau. A Monfalcon, une grande cuantitât di materiâl e je restade su la splaze. Confermâts i dams dilunc de cueste inte zone di Barcola a Triest e intal teritori comunâl di Mugle. Ancje la mont e mostre segns impuartants di dams, di Cjistielgnûf a Frisanc, di Resie in Val Saisare, dulà che e je stade prejudicade ancje la piste di schi di fonts. (A.I.) – 09.11.2023
123
