A Udin al torne il festival des ‘bufulis’

Al scomence martars ai 14 a Udin il “Fake News Festival”, un avigniment unic intal panorame locâl e nazionâl talian pe atualitât dal teme – lis notiziis falsis, distorteadis o manipoladis, chês che ur disin ‘bufulis’ – che al sarà declinât intai tancj apontaments in program fin ai 19 di Novembar. Il prin al è in program li de Torate di Sante Marie aes 6 dopomisdì: la taule taronde “Big data, rischi e opportunità”, che e tache de cuantitât di dâts furnide ogni dì dai struments che si doprin cetant al dì di vuê, viodût che a fasin part de nestre vite par lavorâ, ma ancje di chê privade e sociâl: dai telefons ai televisôrs, aes cjartis di credit e vie indevant. A fevelâ dal teme, Marco Sartor e Luca Di Gaspero e i rapresentants di trê aziendis dal teritori, Daniela Castiglione, Paolo Sacco e Matteo Zanirati. (A.I.) – 13.11.2023