“O sin stâts i prins students di une scuele taliane in visite li de Osce (Organizazion pe sigurece e la cooperazion in Europe). Al è stât pardabon interessant. Si sin sintûts impuartants”. Si sint la emozion, zontade a un pocje di meretade braùre, intes peraulis di dôs studentis dal Isis Deganutti di Udin, che a ricuardin lis tapis dal “viaç-premi” a pene concludût a Viene di une rapresentance des classis 4A e 5B de direzion Relazions internazionâls pal marketing, fat pussibil in graciis dal premi concuistât des dôs classis al concors “AICCRE la Europa che vorrei” cuntun progjet di ricercje diret a valorizâ i dirits esprès midiant grafîts e murales.
I students udinês, acetâts inte sede vienese de Osce di doi dai components de Rapresentance permanente de Italie li de Osce, il Vice Cjâf Mission Massimo Drei e il Prin Segretari Vito Pierro, a àn visitât la sale dal Consei permanent dulà che a àn imparât ce che e fâs la istituzion, cemût che e opere, cualis missions e à ativis cumò e tantis altris curiositâts. (a.d.g.) – 14.11.2023
