Maratone di leture pai 100 agns di Svevo

Cent agns indaûr al leve fûr “La coscienza di Zeno” di Italo Svevo, deventât une des fondis dal modernisim: di alore no si contin lis traduzions, lis riscrituris, lis rileturis intune trentine di lenghis, tant che i coments critics. Lis celebrazions pai cent agns dal romanç a van indevant martars ai 21 cul “Svevo Day”: in ocasion de Zornade de leture a vôs alte, lis citâts di Gurize e Triest a fasaran un omaç aes pagjinis de opare di Svevo cuntune maratone di leture che e durarà passe 15 oris e e viodarà la partecipazion di students des scuelis, universitaris, insegnants, atôrs e apassionâts di leterature. In dut a saran almancul 300 lis vôs che si alternaran inte leture publiche des pagjinis di “La coscienza di Zeno”, tacant aes 9 di matine a Gurize, par passâ dopomisdì a Triest fint aes 2 di gnot. (A.I.) – 20.11.2023