Miercus ai 22 di Novembar a saran premiadis a Udin lis aziendis vincidoris dai Energy Awards Fvg 2023, il concors promovût de Agjenzie pe energjie dal Friûl-Vignesie Julie (www.ape.fvg.it) par ricognossi l’impegn des impresis plui virtuosis intal cjamp de sostignibilitât energjetiche.
Dopo il sucès des dôs edizions precedentis dal concors, dedicadis aes aministrazions comunâls, pal an 2023 al è stât coinvolt un altri setôr che al varà un rûl fondamentâl intai obietîfs di decarbonizazion: si trate juste apont des impresis, di cualsisedi setôr e grandece.
La partecipazion volontarie al concors e previodeve la compilazion di une liste di control de bande dai candidâts. A son stadis butadis jù lis graduatoriis: di là de aziende vincidore dai Energy Awards 2023, chê che e à doprât in maniere plui sostignibile la energjie in linie cui obietîfs dal Green Deal european, a saran assegnâts ancje i premis a chestis categoriis: eficience energjetiche; ûs di fonts rinovabilis; riduzion des emissions alteradoris dal clime; comunicazion; mobilitât; economie circolâr. (a.d.g.) – 20.11.2023
