Il teatri partecipât di Paolo Rossi al vierç martars ai 28 il cartelon dal Gnûf Teatri ‘Lavaroni’ di Dartigne. La date di “Da questa sera si recita a soggetto” e je une sorte di anteprime de tournée di Rossi intal circuit dal Ert, che si disviluparà intal 2024 cuntune serade in Zenâr e altris cuatri in Març. Ancje il public al sarà cjapât dentri inte metude in sene che, propit par chest motîf, ogni sere e presente elements gnûfs e diferents a pet di chê prime. Il progjet, nassût intai laboratoris teatrâi tignûts dal atôr ator pe Italie, al è ispirât a Luigi Pirandello e ae trilogjie dal “teatri tal teatri” che intai agns Vincj dal Nûfcent e à rivoluzionât la maniere tradizionâl di recitâ, cence limitâ la azion dai atôrs dome al palc, ma fasintju lâ ancje in platee, intai palcs, tirant dentri il public come che al fos part dal spetacul. (A.I.) – 27.11.2023
Foto di Luigi Pozzo
