Inteletuâi e artiscj dongje ae “Patrie”

Joibe ai 30 di Novembar, sul palc dal Teatri “S. Giorgio” di Udin, artiscj e inteletuâi furlans a saran protagoniscj de seconde edizion di “Stin dongje ae Patrie”, une serade di poie a “La Patrie dal Friûl”, la riviste in lenghe furlane di vite plui lungje, fondade intal 1946 di Pre Bepo Marchet e Felix Marchi. Culì a saran ospits di rilêf dal panorame musicâl, leterari e teatrâl di cjase nestre, tacant di Cristina Mauro e Stefano Montello dai FLK e, simpri pe musiche, la corâl Vôs de Vile di Vilegnove di S. Denêl, ma ancje Leo Virgili e Nicole Coceancig, che cun Davide Raciti a presentaran il progjet “Cûr di veri”. Par ce che al tocje la scriture leterarie e teatrâl, a saran ospits Maurizio Mattiuzza e Matteo Bellotto. A rapresentâ il mont dal teatri Massimo Somaglino, vuê diretôr dai Teatri Stabil Furlan, di simpri interprete de anime dispès scuindude dal Friûl. La serade e varà ancje un altri ospit speciâl, che al celebre i 50 agns di ativitât: Ermes di Lenardo, in art Sdrindule. (A.I.) – 29.11.2023