Istrate, la storie di un campion adotât di Vile di Flum

La aministrazion comunâl di Vile di Flum e à inmaneât une serade titulade “Sono un ragazzo di strada – Dal nulla al tetto del mondo” (“O soi un fantat di strade – Dal nuie su la piche dal mont”), in onôr di Claudiu Istrate, rumen di nassite e fluman di adozion, lotadôr di arts marziâls, deventât tra i protagoniscj plui grancj de sene mondiâl cu la concuiste dai titui di campion european e di vicecampion mondiâl inte specialitât K1. Inte aule magne dal Palaçut dal sport, l’atlete di vincjevot agns de Kombat Gym di Vile di Flum, scuviert in zovine etât dal mestri Gianbattista Boer, al à contât la sô storie: tacant de infanzie dificile in Romanie fint ae riunion cui gjenitôrs in Italie, e cuntun obietîf ben precîs za di piçul, chel di deventâ un campion. (A.I.) – 30.11.2023