I furlans di Ushuaia a memorein la nassite de citât, 75 agns indaûr

Intal 1948, cualchi centenâr di talians, fra chescj ancje 145 furlans, a son stâts protagoniscj de imprese straordenarie che e à puartât ae realizazion de citât di Ushuaia, in Patagonie, la localitât plui a Sud dal mont, inte Tiere dal Fûc, che vuê e conte plui o mancul 70 mil abitants, cun diviersis fameis origjinariis dal Friûl-Vignesie Julie. Pai 75 agns di chê esperience, miercus ai 13 li de antighe Casa Belan inte citât argjentine, la aministrazion comunâl e la associazion Clape a àn inmaneât un incuintri public par memoreâ l’avigniment, cu la presentazion dal libri di Lucio Gregoretti “Alla fine del mondo” (“Ae fin dal mont”), che traviers testemoneancis e documents al ricuarde i sacrificis, lis sperancis, il lavôr e la afermazion dai nestris conazionâi in chel lûc cussì inospitâl. A parteciparan i citadins aministradôrs, il consul Moreno Salvador, Mauro Sabbadini e cualchi dissendent di chel prin insediament. (A.I.) – 12.12.2023