Il lunari dal Ecomuseo di Glemone dedicât al patrimoni minôr

Di simpri l’Ecomuseo delle acque di Glemone al preste une atenzion particolâr a chel che al ven definît “patrimoni minôr”, o sedi i bens e lis oparis che a puntinin il teritori e che a son espression de comunitât, de sô culture, dal so mût di palesâsi. Chest patrimoni ogni an al cjate legjitimazion intes pagjinis dal lunari che l’Ecomuseu al confezione: il lunari 2024 al è dedicât ai segns devozionâi, tant che lis anconis, i capitei votîfs, i crucifìs, i afrescs muraris, ancjemò presints dilunc des stradis, aes beorcjis, su lis façadis des cjasis. Il calendari al vignarà presentât sabide ai 16 di Dicembar aes 5 dopomisdì intal Lab taramot in place Municipio 5 a Glemone. Lis fotos come par tradizion a son di Graziano Soravito, che si è impegnât intune capilâr e apassionade ricercje dai segns de fede distribuîts sul teritori glemonat. Di dutis lis anconis dentri intal lunari si contin la storie e lis vicendis che lis àn segnadis. (a.d.g.) – 13.12.2023