Tra i mieçs pesants in fermade inte stazion di Servizi Fratta Nord, direzion Vignesie, lis Flamis zalis a àn individuât un autoarticolât cun rimorchi di nazionalitât slovache, che il so conducent, ae domande di mostrâ la documentazion de cjame traspuartade, al à consegnât sfueis cun diviersis scanceladuris e dadis no compatibii cul percors fat. Il control dal mieç al à permetût di cjatâ 21 toneladis di pellet, confezionât in sacs di plastiche, cul bol che al rapresente la certificazion plui difondude dai pellets. Al è saltât fûr che la aziende produtore, slovache, di Otubar no je plui autorizade a comercializâ il prodot cul bol ripuartât in etichete, parcè che nol rispuint aes carateristichis duris imponudis de normative comunitarie. La cjame e je stade secuestrade e i financîrs si son ativâts daurman, cul jutori ancje dal Centri di Cooperazion Internazionâl di Polizie austriac, par verificâ altris importazions in Italie dal stes prodot, in efiets za consegnât a buteghîrs e clients in Lombardie. La Procure di Pordenon e à ordenât percuisizions intes provinciis di Bergamo, Cremone e Mantue: a son stadis cussì secuestradis altris 190 toneladis di pellet, cumò sometudis a analisi di laboratori par verificâ la eventuâl presince di sostancis chimichis tossichis e nocivis pe salût umane. (a.d.g.) – 14.12.2023
278
