Il museu de leterature al nas intal dì dal complean di Svevo

Ai 19 di Dicembar dal 1861 – al jere une joibe – al nasseve a Triest Aron Hector Schmitz, vuê par ducj Italo Svevo. Intal 2023 che al celebre i cent agns de publicazion di “La coscienza di Zeno”, un dai romançs plui rapresentatîfs dal Nûfcent talian, Triest e celebre Italo Svevo in mût speciâl in ocasion dal so complean. Une ricorence che ogni an ai 19 di Dicembar e devente une grande fieste inte sede dal Museo Sveviano e intai lûcs dal scritôr, prin fra ducj la centrâl place Hortis, intal cûr de citât, dulà che di doi decenis e je la statue a grandece naturâl fate dal artist triestin Nino Spagnoli. Dai 19 ai 21 di Dicembar e je previodude la cunvigne internazionâl “I mondi di Zeno”, ma l’avigniment centrâl al è la inaugurazion dal Museu “LETS – Letteratura” di Triest, a Palaç Biserini in place Hortis: il prin spazi public là che lis diviersis animis culturâls e linguistichis di Triest si cjataran adun intal non de leterature. (A.I.) – 18.12.2023