Festival di musiche sacre: si siere cul Rinassiment

Une esortazion fuarte e luminose, tant che lis notis che nus àn consegnât i mestris dal Rinassiment, sugjestive tant che la gnot uniche e speciâl di Nadâl. “Venis spes mundi” al è il titul dal conciert conclusîf de trentesime seconde edizion dal Festival internazionâl di Musiche Sacre di Pordenon, miercus ai 20 intal Domo di S. Marc, dulà che al sunarà La Rossignol, l’Ensemble di Musiche Rinassimentâl che e à concuistât i publics di dut il mont e e à lavorât cun grancj artiscj, prin fra ducj il regjist Ermanno Olmi. Il Conciert al siere il cartel 2023 dal Festival, ideât e promovût di Presenza e Cultura, pe direzion artistiche dai mestris Franco Calabretto e Eddi De Nadai. (A.I.) – 19.12.2023