La Procure de Republiche di Pordenon e à rimandât a judizi doi citadins pakistans che par agns a àn disfrutât desenis di conazionâi al lavôr tra lis vîts dal Trevisan e dal Friûl Ocidentâl, scuedint desenis di miârs di euros a titul di “rimbors” par sostignî spesis inesistentis di sanatorie.
Intal Avrîl dal 2020 i Carabinîrs dal Repart operatîf dal Comant Provinciâl di Pordenon a àn scomençât une investigazion complesse par contrastâ il caporalât, fenomen dal dut gnûf su la sene furlane, saltât fûr dopo che cierts pakistans, dilunc di une manifestazion devant de Prefeture di Pordenon, a vevin denunziât di jessi disfrutâts di lôr conazionâi. I doi pakistans, titulârs di aziendis a lôr intestadis, vie pai agns a àn assumût e disfrutât desenis e desenis di lôr conazionâi.
Intal cors de investigazion, durade cuasi doi agns, al è vignût fûr che su 81 vitimis, ben 37 a àn vût il cûr di denunziâ i caporâi, declarant che par agns a àn vût di vivi cun pocjis desenis di euros al mês e tornâ lis lôr paiis ai datôrs di lavôr, cu la promesse – mai mantignude – di otignî in cambi di miârs di euros parom i permès di permanence in Italie. (a.d.g.) – 20.12.2023
