Malignani di Udin, tra lis scuelis che a fasin plui inovazion

Il Malignani di Udin al è tra lis undis scuelis che a fasin plui inovazion intal Paîs. Secont un articul publicât ai 18 di Dicembar sul cuotidian “La Repubblica”, l’istitût al è une des scuelis talianis plui ae avanvuardie. Il studi al è stât fat di Ashoka, associazion no profit ative dal 1980 che, par fâlu, si è metude dongje di Indire, braç sientific dal Ministeri de Istruzion. La investigazion “La mapadure de inovazion educative”, a pene presentade ae Cjamare dai Deputâts, e à individuât cuntun cuistionari undis scuelis inovativis che a puedin metisi al cjâf di un cambi gjenerâl di paradigme. Chestis scuelis a van dentri intune rêt internazionâl di 280 istitûts. Di là dal Malignani, in regjon tra lis scuelis inovativis al è ancje il Coleç dal mont unît Uwc Adriatic di Duìn (Triest). (a.d.g.) – 20.12.2023