Al è di doi muarts il belanç di ancjetancj incidents stradâi grâfs tra il dopomisdì sul tart e la serade di domenie ai 7 di Zenâr. Socorûts sul puest, doi oms a son muarts in ospedâl a pocjis oris di distance l’un di chel altri. Gino Volpatti, 77 agns, imprenditôr agricul di Dograve di S. Zorç de Richinvelde al è muart îr di sere intal repart di Terapie intensive dal ospedâl di Pordenon, dulà che al jere stât traspuartât in codiç ros dai sanitaris dopo che si jere ribaltât cu la sô Citroen dilunc de provinciâl a S. Martin di Voleson tor des 5 dal dopomisdì, dopo jessi lât fûr di strade forsit par vie di un mâl. Sul puest, dulà che a son intervignûts ancje lis Vuardiis dal Fûc di Spilimberc, i operadôrs dal 118 a jerin rivâts a rianimâlu, ma i miedis no àn podût salvâlu par vie des feridis masse gravis.
No le à fate nancje Francesco Cignolini, 53 agns di Bertiûl, muart vie pe gnot tal ospedâl di Udin. Fatâl il scuintri a Bertiûl dilunc la Napoleoniche ae crosere cun vie Pocec, tor des 7 e mieze sot sere, tra la sô Kia Sportage, finide intun fossâl, e une Audi A5 vuidade di un triestin di 49 agns, ferît ma no in maniere serie. A vê la piês Cignolini, che al è stât estrat dai lamarins des Vuardiis dal Fûc di Codroip, ripiât sul puest dai sanitaris e traspuartât in svol al ospedâl di Udin. L’om al è muart cualchi ore plui tart. (a.d.g.) – 08.01.2024
