Il teatri di Pirandello viodût dal canocjâl

Il gnûf an si vierç al Teatri comunâl di Cormons cuntun classic di Luigi Pirandello, “Così è (se vi pare)”, in prime regjonâl cun Milena Vukotic, Pino Micol e Gianluca Ferrato pe regjie di Geppy Gleijeses. Scrite intal 1917, la comedie plui biele fate dal scritôr e conte la prove di fâ lûs, intune citât di provincie, su la identitât de femine dal gnûf segretari de Prefeture. La idee par cheste gnove version dal spetacul e nas di une intuizion di Giovanni Macchia, il critic plui innomenât di Pirandello: il canocjâl disledrosât. Il regjist al à domandât a un dai plui impuartants video artiscj di creâ, intun contignidôr vueit, piçui oms e feminis alts 50 centimetris: ven a stâi, i personaçs de comedie, che a tornin aes dimensions normâls devant de grandece dal dolôr. (A.I.) – 08.01.2024